ເຈົ້າຄອງນະຄອນຫຼວງອາຊຽນ ຮ່ວມກັນເພີ່ມທະວີເຊື່ອມຈອດ ແລະ ສ້າງຄວາມເຂັ້ມແຂງການພັດທະນາແບບຍືນຍົງຂອງບັນດານະຄອນຫຼວງອາຊຽນ

ກອງປະຊຸມເວທີເຈົ້ານະຄອນອາຊຽນ (AMF) ປີ 2024 ພາຍໃຕ້ຄໍາຂວັນ “ເພີ່ມທະວີການເຊື່ອມຈອດ ແລະ ສ້າງຄວາມເຂັ້ມແຂງເພື່ອການພັດທະນາແບບຍືນຍົງຂອງບັນດານະຄອນອາຊຽນ ໄດ້ຈັດຂຶ້ນວັນທີ 18 ກັນຍາ 2024 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ໂດຍການເປັນປະທານຂອງທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງ, ເປັນກຽດເຂົ້າຮ່ວມຂອງທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍບັນດາທ່ານເຈົ້າຄອງ, ຮອງເຈົ້າຄອງນະຄອນຫຼວງອາຊຽນ ແລະ ບັນດາທ່ານເຈົ້ານະຄອນ-ເຈົ້າເມືອງຂອງປະເທດສະມາຊິກອາຊຽນ ແລະ ນະ ຄອນຫຼວງດີລີຂອງຕີມໍແລັດສະເຕ ເລຂາທິການໃຫຍ່ອາຊຽນ ປະທານອົງການ ແລະ ເລຂາທິການຂອງອົງການຕົວເມືອງ ແລະ ການປົກຄອງທ້ອງຖິ່ນອາຊີປາຊີຟິກ ຕະຫຼອດຮອດຜູ້ແທນຂັ້ນສູງຂອງເຄື່ອຂ່າຍບັນດານະຄອນອາຊີຕາ ເວັນອອກສ່ຽງໃຕ້ຂອງສະມາຄົມບັນດານະຄອນທີ່ນໍາໃຊ້ພາສາຝຣັ່ງ ແລະ ພາກສ່ວນກ່ຽວຂ້ອງ.

ໃນກອງປະຊຸມ, ທ່ານ ສອນໄຊ ສີພັນດອນ ໄດ້ກ່າວເປີດ ແລະ ໄດ້ຕີລາຄາສູງຕໍ່ກອງປະຊຸມໃນຄັ້ງນີ້ ຊຶ່ງຈະເປັນໂອກາດອັນດີສໍາລັບບັນດາເຈົ້າຄອງນະຄອນຫຼວງອາຊຽນ ແລະ ເຈົ້ານະຄອນອາຊຽນໃນການຈັດຕັ້ງຜັນຂະຫຍາຍຄໍາໝາຍໝັ້ນຂອງຕົນໃນກອງປະຊຸມຄັ້ງຜ່ານມາເຂົ້າໃນວຽກງານການພັດທະນາຕົວເມືອງໃຫ້ທັນສະໄໝ ໜ້າຢູ່ ແລະ ຍືນຍົງ ໂດຍສະເພາະການສ້າງຄວາມເຂັ້ມແຂງໃນການຮ່ວມມືແລກປ່ຽນຂໍ້ມູນ ແລະ ບົດຮຽນການຈັດຕັ້ງປະຕິບັດຕົວຈິງໃນການພັດທະນາ ແລະ ແກ້ໄຂບັນຫາ ແລະ ສິ່ງທ້າທາຍຕ່າງໆໃນຕົວເມືອງ ເພື່ອເຮັດໃຫ້ການຮ່ວມມືກັນກ້າວໄປສູ່ລວງເລິກ ແລະ ເປັນຮູບປະທໍາ ພ້ອມທັງເຊື່ອໝັ້ນວ່າບັນດາເຈົ້າຄອງນະຄອນຫຼວງອາຊຽນ ແລະ ບັນດານະຄອນອາຊຽນເຫັນໄດ້ເຖິງບົດບາດ ຄວາມສໍາຄັນໃນການຈັດກອງປະຊຸມຮ່ວມກັນ. ການເຂົ້າຮ່ວມຂອງບັນດາທ່ານເປັນການປະກອບສ່ວນເຂົ້າໃນການສ້າງປະຊາຄົມອາຊຽນໃຫ້ມີຄວາມເຂັ້ມແຂງ ແລະ ຍືນຍົງ ເຮັດໃຫ້ການຮ່ວມມືຂອງບັນດານະຄອນຫຼວງ ແລະ ບັນດານະຄອນອາຊຽນໃນດ້ານຕ່າງໆນັບມື້ນັບເກີດດອກອອກຜົນຍິ່ງຂື້ນ. ພ້ອມດຽວກັນນັ້ນ, ກອງປະຊຸມຄັ້ງນີ້ຈະເປັນການປະກອບສ່ວນອັນສໍາຄັນເຂົ້າໃນການສົ່ງເສີມການພັດທະນາ ການແລກປ່ຽນບົດຮຽນທີ່ດີຮ່ວມກັນໃນການແກ້ໄຂບັນຫາຕ່າງໆຂອງຕົວເມືອງໄປພ້ອມກັບການຈັດຕັ້ງປະຕິບັດບັນດາແຜນງານ ແລະ ແຜນດໍາເນີນງານ ເພື່ອໃຫ້ບັນລຸຄໍາໝາຍໝັ້ນຂອງນະຄອນອາຊຽນໃນການສົ່ງເສີມການເຊື່ອມຈອດ ແລະ ຄວາມເຂັ້ມແຂງເພື່ອການພັດທະນາແບບຍືນຍົງຂອງບັນດານະຄອນຫຼວງອາຊຽນ ແລະ ນະຄອນອາຊຽນ ພ້ອມທັງເຊື່ອໝັ້ນວ່າຜູ້ແທນກອງປະຊຸມຈະເອົາໃຈໃສຸ່ແລກປ່ຽນຄວາມຮູ້ຄວາມສາມາດ ແລະບົດຮຽນທີ່ດີຂອງຕົນໃນກອງປະຊມຄັ້ງນີ້ ແລະ ພ້ອມກັນດໍາເນີນກອງປະຊຸມດ້ວຍບັນຍາກາດສ້າງສັນຕາມຄໍາຂວັນຂອງກອງປະຊຸມ ກໍຄື ເພີ່ມທະວີການເຊື່ອມຈອດ ແລະ ຄວາມເຂັ້ມແຂງ ເພີ່ອການພັດທະນາແບບຍນຍົງຂອງບັນດານະຄອນອາຊຽນ” ຊຶ່ງຄໍາຂວັນດັ່ງກ່າວ ໄດ້ສອດຄ່ອງກັບນະໂຍບາຍ ແລະ ເປົ້າໝາຍຂອງ ສປປ ລາວ ໃນການຫັນປະເທດຈາກປະເທດທີ່ບໍ່ມີຊາຍແດນຕິດກັບທະເລໃຫ້ເປັນສູນກາງຂອງການເຊື່ອມໂຍງ-ເຊື່ອອມຈອດຂອງພາກພື້ນ ແລະ ທັງສອດຄ່ອງກັບເປົ້າໝາຍລວມຂອງອາຊຽນໃນການສ້າງປະຊາຄົມອາຊຽນໃຫ້ເປັນພາກພື້ນທີ່ມີການເຊື່ອມໂຍງ-ເຊື່ອມຈອດ ມີຄວາມເຂັ້ມແຂງເພື່ອການພັດທະນາ ສາມາດຮັບມືກັບສິ່ງທ້າທາຍຕ່າງໆໄດ້ຢ່າງມີປະສິດທິພາບ ແລະ ທັນການ.

ທ່ານ ອາດສະພັງທອງ ສີພັນດອນ ໄດ້ກ່າວບາງຕອນວ່າ: ກອງປະຊຸມເຈົ້າຄອງນະຄອນຫຼວງອາຊຽນ (MGMAC) ແລະ ກອງປະຊຸມເວທີເຈົ້ານະຄອນອາຊຽນ (AMF) ໄດ້ດໍາເນີນມາເປັນໄລຍະ 12 ປີ ນັບແຕ່ປີ 2012 ເປັນຕົ້ນມາ ຊຶ່ງໄດ້ກາຍເປັນເວທີໃຫ້ແກ່ບັນດາການນໍາຂັ້ນທ້ອງຖິ່ນໄດ້ມີການພົບປະແລກປ່ຽນ ໂດຍສະເພາະບັນດາບົດຮຽນ ປະສົບການ ແລະ ສິ່ງທ້າທາຍຂອງນະຄອນຕົນ ໃນກອງປະ ຊຸມຄັ້ງນີ້ ນະຄອນຫຼວງວຽງຈັນ ໄດ້ກຳນົດຄໍາຂວັນທີ່ສອດຄ່ອງກັບຄໍາຂວັນປະທານອາຊຽນ ປີ 2024 ຂອງ ສປປ ລາວ ໂດຍໄດ້ກຳນົດຄໍາຂວັນຂອງກອງປະຊຸມ “ເພີ່ມທະວີການເຊື່ອມຈອດ ແລະ ຄວາມເຂັ້ມແຂງເພື່ອການພັດທະນາແບບຍືນຍົງຂອງບັນດານະຄອນອາຊຽນ” ຊຶ່ງປະກອບມີ 5 ຂົງເຂດວຽກງານທີ່ສໍາຄັນ ຄື: ຕົວເມືອງທີ່ໜ້າຢູ່ ແລະ ຍືນຍົງ ການທ່ອງທ່ຽວສີຂຽວ ການພັດທະນາເສດຖະກິດແບບຍືນຍົງ ຕົວເມືອງທີ່ມີຄວາມຍືນຍົງທາງດ້ານສິ່ງແວດລ້ອມ ແລະ ຄວາມເຂັ້ມແຂງທາງດ້ານການປ່ຽນແປງດິນຟ້າອາກາດ ເພື່ອເຮັດໃຫ້ພວກເຮົາໄດ້ມີການແລກປ່ຽນທັດສະນະ ແລະ ປະກອບຄໍາຄິດເຫັນສາມາດຮ່ວມກັນກໍານົດນະໂຍບາຍ ແລະ ຈັດຕັ້ງປະຕິບັດຕົວຈິງ.